Вчера две лица загинаа во две одделни сообраќајни несреќи што се случија во Струмичко, соопштија денеска од СВР Струмица.
Вчера во 16:35 часот во полицијата било пријавено дека на на магистралниот пат Радовиш-Струмица, на место викано „Слобода“, кај клучката за селата Добрашинци и Нова Маала, автомобил „пежо“ со струмички регистарски ознаки, управуван од К.В.(46) од село Сушево, струмичко, се превртел на коловозот. Од здобиените повреди на местото на несреќата починал возачот, а лекар од Итната медицинска помош констатирал смрт.
Во втората сообраќајна несреќа, која се случила на на регионалниот пат Р1402, на делницата од село Габрово до село Банско, загинал К.Д.(63) од село Градско Балдовци, струмичко. Тој, управувајќи мопед со струмички регистарски ознаки, изгубил контрола и со мопедот паднал на коловозот. Од повредите на местото на несреќата починал возачот на мопедот.
И во двата случаи лекар констатирал смрт, а по наредба на јавен обвинител, телата на починатите се дадени на обдукција.
Увид на местото на несреќите, во присуство на јавен обвинител, извршила екипа од СВР Струмица.
