Ниту шефот на државата Стево Пендаровски не го видел договорот со „Бехтел и Енка“ за изградба на автопатите. Тој посочува дека сака да ја види расправата во Парламентот, која исто така е заглавена оти пратениците од ВМРО-ДПМНЕ бараат копија од договорот, а не некој да им го раскажува. Пендаровски е дециден дека указ за закон во кој ќе биде пропишано 60-часовно работно време, нема да потпише.
„Не сум го видел, знаете дека е направена делумна декласификација за пратениците кои имаат безбедносен сертификат. Јас го немам видено во изворна форма.
Прво сакам да ја видам парламентарната расправа ова што ќе биде на комисијата и да видиме кои прашања ќе произлезат од таа дебата иако мојот став го знаете, сакам да ги видам дефинитивните верзии на сите тие осум закони кои се во парламентарна процедура“, вели Пендаровски.
Законот со кој ќе се дозволи 60-часовно работно време, поради договорот со конзорциумот, нема да се потпише.
„Тоа ако остане во таа варијанта – не. Уставниот суд ја прогласи за неуставна таа одредба во еден друг закон, не можеме да ги повторуваме грешките. И да го потпишам, а нема да го потпишам ако е таква одредбата, јасно е дека Уставниот суд, следејќи ја својата претходна одлука, повторно ќе ја прогласи за неуставна“, додава Пендаровски
