Електронските изводи од матичните книги се убедливо најкористената услуга на порталот „uslugi.gov.mk“, потврди министерот за дигитална трансформација, Стефан Андоновски.
Граѓаните веќе можат целосно електронски да аплицираат и да ги добијат изводите од матичната книга на родените, венчаните, умрените, како и потврдата за слободна брачна состојба. Документот пристигнува директно во електронското сандаче на порталот и на мејл-адресата на корисникот.
Крај за печатените документи?
Иако дигитализацијата напредува, многу институции сè уште инсистираат на печатена верзија на изводите поради застарени законски одредби. Министерот Андоновски најави дека веќе се работи на измени на поединечните закони за да се овозможи институциите да ги прибираат податоците по службена должност.
„Институциите треба сами да ги прибираат податоците за државјанство, изводите и потврдите за неосудуваност. МВР веќе го прави тоа при издавање лиценци. Моја задача е да кажам дека техничката можност постои, а секоја институција има обврска тоа да го реализира,“ изјави Андоновски.
Кои се најпопуларните е-услуги?
Според податоците од порталот, граѓаните најчесто ги користат следниве четири услуги:
Издавање извод од матична книга на родените;
Барање за одобрение за набавка на оружје;
Потврда од казнена евиденција;
Уверение за стаж, остварени плати и придонеси (М1/М2).
Покачување на платите во Министерството за дигитална трансформација
Министерот соопшти и дека е потпишан договор со синдикатите, со што 180 вработени во ова министерство ќе добијат повисоки мартовски плати. Со планираните додатоци, се очекува платите во овој сектор да пораснат за 25 до 30 отсто до 2028 година.
