Приватните специјализанти на Клиниката за детски болести ќе ги добијат платите за декември и јануари, а за да им бидат исплатени на надоместоците од октомври навака се чека согласност од Фондот за здравствено осигурување, вели директорката на Клиниката, Стојка Нацева-Фуштиќ. Согласноста за исплата на платите на приватните специјализанти за декември и јануари, директорката Нацева – Фуштиќ објаснува дека ги добиле на од Фондот на крајот на јануари.
„Во врска со реакцијата на специјализанти и млади лекари поврзана со исплатата на плати и дежурства ЈЗУ Универзитетска клиника за детски болести – Скопје ја информира јавноста дека по добиената согласност од ФЗОМ од 26.01.2023 година, направени се пресметки за исплата на плати за месец 12/22 и 01/23 и по истите ќе биде постапено во целост. По однос на исплата на надоместоци за дежурства за месец 08/22 и 09/22 извршена е исплата, а за месеците 10/22, 11/22, 12/22 и 01/23 ќе биде извршена исплата по добиена согласност од ФЗОМ“, вели директорката Нацева – Фуштиќ.
Приватните специјализанти на Детската клиника пред два дена алармираа дека се обиделе преку бојкот на работата да изразат револт поради неисплатена плата од декември навака и неисплатени дежурства од август 2022 година навака, но од управата на болницата добиле закани дека ќе им ги прекинат специјализациите и ќе биде објавен нов конкурс за специјализанти. Се пожалија и дека се во постојан конфликт со административните служби секогаш кога треба да им се префрлат плати.
И нивните исплати зависат од Фондот кој веќе две недели е под сајбер-напад поради кој сите јавни здравствени установи се задолжени до понеделник да достават документација за исплата на плати, а здравствените работници, исто така до понеделник, оставија рок да им бидат исплатени платите. Ако не им се исплатат најавија генерален штрајк.
