Францускиот селектор Дидие Дешам официјално го откри 26-члениот состав на репрезентцијата што во Катар ќе ја брани својата светска титула и каде што ќе се обидат да станат само третата нација што ја одбранила титулата по Италија (1934, 1938) и Бразил (1958, 1962).
Франција е во група со Австралија, Данска и Тунис и во составот нема поголеми изненадувања по потврдените отсуства на Пол Погба и Н’Голо Канте поради повреди.
На голот речиси сигурно стартер ќе биде Иго Љорис од Тотенхем, особено по повредата на Мајк Мањан од Милан, а негови замени ќе бидат Алфонс Ареола и Стив Манданда. Рафаел Варан од Манчестер јунајтед доби место во тимот и покрај повредата што ја доби неодамна и, најверојатно, ќе биде стартер ако биде фит, а Вилијам Салиба, Лукас Ернандез, Преснел Кимбембе, Ибрахима Конате и Дајот Упамекано ќе бидат во тесен избор за една од позициите на централен бек. Бенжамин Павар и Тео Ернандез, најверојатно, се стартери на крилните позиции.
Во средниот ред, и покрај повредите на Погба и Канте, Дешам има доста опции, особено во двата млади талента на Реал Мадрид, Едуардо Камавинга и Орелиен Чуамени. Шанса ќе добијат и Адриен Рабио и препородениот Матео Гендузи.
Во нападот, пак, триото Килијан Мбапе – Антоан Гризман – Карим Бензема би требало да биде сигурно како стартер, но тука е и ветеранот Оливие Жиру, како и Усман Дембеле, Кристофер Нкунку и Кингсли Коман.
