Денеска е Петровден – за многу години!
На 12 јули, според Јулијанскиот календар на Македонската православна црква, верниците го одбележуваат големиот христијански празник Светите првоврховни апостоли Петар и Павле, во народот познат како Петровден.
Со овој ден завршува Петровскиот пост, еден од четирите големи повеќедневни пости во православната година, кој секогаш се завршува на Петровден. Ова е ден кога Црквата се сеќава на двајцата најзначајни Христови ученици – апостолот Петар, симбол на цврста и непоколеблива вера, и апостолот Павле, ревносен проповедник и мисионер, кој го проширил христијанското учење низ тогашниот свет.
Историски, празникот на светите апостоли Петар и Павле се утврдил дури пред празнувањето на сите 12 апостоли, што сведочи за нивната исклучителна улога во темелите на Христијанската Црква. Нивното дело, нивната жртва и нивната вера се столбовите врз кои се изградила апостолската традиција.
На Петровден, храмовите се исполнуваат со верници кои со молитва и благодарност го чествуваат овој свет ден. Традицијата се продолжува и во домовите, каде се собираат семејства, се празнува и се пренесува споменот за верата, пожртвуваноста и љубовта кон Христа.
Нека е честит и за многу години Петровден!
