Фудбалерот на Барселона, Френки де Јонг демантираше дека одбил да прифати намалување на платата во каталонскиот клуб, пренесуваат шпанските медиуми.
Барселона во текот на летото се обиде да го продаде Де Јонг на Манчестер Јунајтед, но холандскиот фудбалер одби да ја продолжи кариерата во англискиот клуб.
Некои медиуми објавија дека Барселона му должи пaри на Де Јонг, како и дека холандскиот фудбалер одбил да го ревидира договорот поради тешката финансиска ситуација во која се наоѓа клубот од „Ноу Камп“.
„Имаше многу лаги за мојата плата. Во секоја од трите години колку сум во Барселона, мојата плата беше намалувана. Парите на крајот се враќаат, па се чини дека ги има многу. Луѓето не го разбираат ова, но бројките што ги прикажуваат медиумите се лажни“, рече репрезентативецот на Холандија.
Де Јонг (25) пристигна во Барселона во 2019 година од Ајакс за 85 милиони евра. За каталонскиот клуб одигра 151 натпревар и постигна 14 голови.
