Екстремно студено време и голомразица ја погодија Хрватска, создавајќи зголемени ризици за сообраќајот и здравјето на граѓаните, информира Хрватската радио-телевизија (ХРТ). Државниот хидрометеоролошки завод прогласи црвен метеоаларм за голомразица во подрачјето на Осиек, додека за Загреб е на сила портокалов аларм. Утринските температури во западна Хрватска и Славонија се спуштија и до минус 10 степени, со околу минус девет степени измерени во Осиек, Вараждин и Бјеловар. Се очекува дел од врнежите, особено во северозападниот и источниот дел од земјата, да бидат во форма на леден дожд, што дополнително ја зголемува опасноста од сообраќајни незгоди и оштетувања на инфраструктурата.
Студот и нискиот водостој го отежнуваат и пловењето по реката Драва, каде нивото на водата е само осум сантиметри над историскиот минимум. Надлежните служби ја следат состојбата, а според прогнозите можно е замрзнување и на површината на Дунав во наредните денови. Лекарите предупредуваат дека ниските температури претставуваат сериозен ризик, особено за лица со кардиоваскуларни и респираторни заболувања, и препорачуваат престојот на отворено да се ограничи на неопходното. Славонија утрово беше покриена со мраз, додека снег е регистриран на одредени подрачја во Лика и Далмација. Надлежните апелираат граѓаните внимателно да ги следат временските предупредувања. Хрватскиот авто-мото клуб известува за лизгави коловози низ целата земја, со забрани за сообраќај на тешки возила и возила без зимска опрема на повеќе делници. Дел од патиштата се чистат, а поради лошите временски услови привремено се прекинати и некои фериботски и катамарански линии.
