Четири Јеховини сведоци беа осудени на затворски казни во Русија минатата недела поради екстремистичка активност, а пресудите се темелат на тајни видеа снимени од агенти кои се инфилтрирале на нивните молитвени состаноци, изјави портпарол на религиозната група.
Со ова, бројот на Јеховини сведоци затворени од 2017 година, кога Русија ја забрани организацијата како „екстремистичка“, се искачи на околу 220. Во 2022 година, Европскиот суд за човекови права пресуди дека руската забрана е незаконска, а таа беше осудена и од Комитетот за човекови права на Обединетите нации, објави Ројтерс .
Во првиот од двата неодамнешни случаи, Олег Постников (61) беше осуден на шест години и два месеци затвор во градот Биробиџан. „По речиси една година тајно снимање, ФСБ успеа да издвои само неколку состаноци што ги сметаше за „најекстремни“, што всушност докажува дека ние сме обични луѓе кои ги почитуваат сите без исклучок“, рече Постников во својот завршен збор пред судот.
„Карактеристичен пример е завршната молитва во која присутните го замолија Бога за сила да ги издржат тешкотиите предизвикани од прогонството. Нема повици за казнување на нашите прогонители или за нанесување штета.“
Во друг случај, во градот Твер, Валери Толмазов (71), Александар Костјук (53) и Максим Барбазјук (43) беа осудени на по шест години затвор. „Она што се издвојува во овие два нови случаи не е само употребата на тајни агенти, туку и длабочината до која овие агенти се инфилтрирале во мали, тесно поврзани заедници пред да им предадат селективно уредуван материјал на истражителите“, рече Џарод Лопес, портпарол на светското седиште на Јеховините сведоци во Њујорк.
