На 19-ти октомври, граѓаните со едно гласање, ќе и дадат нов правец на историјата. Ова, во интервју за ТВ Шења, го изјави кандидатот за градоначалник на Чаир, Бујар Османи, и уште еднаш направи паралела помеѓу денот на гласањето со 13-ти август.
„Затоа реков, 19-ти октомври е ‘вториот 13-ти август’. Како што денес сите прашуваат ‘каде беше на 13-ти август’, ќе прашуваат ‘каде беше на 19-ти октомври’, изјави Османи.
Според Османи, токму сега е создаден моментот кога историјата се наоѓа на крстопат и кога со одлука, мора да се наруши комфорот и удобноста.
„Јас влегов во оваа битка како ‘работник’, чувар на курсот и на жртвата на луѓето, на нивната пот и крв”, рече Османи.
Тој вели дека нема никаква лична амбиција за кариера во Чаир, бидејќи во својата политичко дејствување ги има достигнато сите можни домашни и меѓународни позиции.
„Јас не сум како мојот противкандидат, кој по 12 години како градоначалник, во кои ја уништи општината и се пресели во Бутел, сега повторно се враќа да бара доверба”, рече Османи.
Според него, Изет Меџити веќе еднаш ја има предадено сопствената организација, сопствениот лидер, активистите што работеле за него, и повторно бара шанса.
„Затоа, сакам да им се обратам на гледачите: Излезете и гласајте! Особено во Чаир. На нас ни падна товарот да го исчистиме овој „лабораториум” што сака да инсталира концепти спротивни на нашите вредности”, потенцираше Османи.
