За време на велигденските празници, непознати сторители извршиле кражба во домот на пратеникот Фатмир Битиќи во скопската населба Бутел. Случајот е пријавен во СВР Скопје на 21 април во 11:40 часот.
Според пријавата, во периодот од 7:30 часот на 18 април до 3 часот наутро на 21 април, крадците со употреба на сила и соодветен алат успеале да влезат во домот и да одземат пари и други вредни предмети.
Битиќи за ТВ24 изјави дека инцидентот се случил околу 3 часот наутро и траел само неколку минути.
„Кражбата траела од 3 и пол до 4 минути. Дома имам поставено аларм и видео надзор. Регистрирани се три лица – две влегуваат во куќата, едното чува стража пред врата. Одземен ни е метален сеф кој беше вграден – буквално го откорнале. Во сефот имаше пари, но и накит кој имаше сентиментално, семејно значење за нас. По упадот, по околу 6 минути реагираше и агенцијата за обезбедување со која е поврзан алармот“, изјави пратеникот.
Битиќи смета дека кражбата не е случајна и дека можеби носи политичка порака. Полицијата работи на расветлување на случајот и идентификација на сторителите.
