Лионел Меси го поставил името на Барселона на светската фудбалска сцена, тврди неговиот брат Матијас Меси, кој додава дека никој не слушнал за клубот додека во него не заиграл големиот Лео.
„Не знам какво е вашето мислење, но Барселона стана позната благодарение на Меси. Никој не знаеше за нив претходно. Кој имал шанса да оди во Барселона, нека го посети нивниот музеј, можете да видите дека тој музеј е само Меси“, вели Матијас.
Тој исто така посочи дека Лео нема да се врати во Барселона бидејќи тоа ќе значи крај за претседателот Жоан Лапорта.
„Не се враќаме во Барселона, и ако го направиме тоа, ќе треба да исчистиме таму. Меѓу другите, да го исфрлиме Жоан Лапорта. Луѓето во Барселона не го поддржаа Лео. Требаше да протестираат, Лапорта да замине, Меси да остане. Шпанците се предавници“, додава Матијас Меси.
Барселона има освоено 26 титули од Ла лига, од кои повеќето беа освоени пред Меси да пристигне на „Ноу Камп“, а во клубот играле легенди како Јохан Кројф, Пеп Гвардиола, Роналд Куман и Патрик Клајверт. Секако, славата на каталонскиот клуб не започнала со момчето од Росарио.
