Мерките што ги носи Владата даваат резултат. Според последните податоци на Државниот завод за статистика, имаме намалување на инфлацијата, односно трошоците за живот во март, вели министерот за економија, Крешник Бектеши.
„Во споредба со претходните месеци, ова е најголемото намалување во споредба со октомври 2022 кога почнаа да се зголемуваат цените во нашата држава и на прехранбените производи и на енергентите. Инфлацијата е намалена за два процента во споредба со претходниот месец и во март изнесува 14,7 %. Најважно е што има намалување на транспортот и храната, што значи дека мерките што ги носиме даваат резултати“, рече Бектеши коментирајќи ги последните податоци на Државниот завод за статистика.
„Платите растат, инфлацијата, односно цените, се намалуваат. Заедно се грижиме за животниот стандард на нашите граѓани“, напиша Бектеши на својот фејсбук-профил.
Според ДЗС, намалување на индексот на трошоците на живот има кај лебот и житата, кои биле пониски за 4,7 отсто. Млекото имало пониска цена за 4,6 отсто, а маслото и маснотиите за 2,4 отсто. За 2,2 отсто пониска цена имале сирењето и урдата, а свежото и разладеното овошје за 1,2 отсто. Во март рибата и морските плодови имале пониска цена за 0,8, а јајцата за 0,2 отсто.
