Производството на ЕСМ е зголемено и сите капацитети се во функција, за тие што ќе ги намалат цените државата да им излезе во пресрет.
Ова го истакна министерот за економија, Крешник Бектеши прашан за коментар за мислењето на дел производителите на млеко и млечни производи кои се за намалување на цените, но поради тоа што имаат нестабилна цена на суровините се пожалиле дека може да претрпат сериозни штети, а некои од нив дека може да испорачуваат помали количини на рафтовите.
На тие кои што нема да ја намалат цената, порача Бектеши, ќе им се укине сета поддршка од државата.
„Во делот на производителите на млеко не очекувам да имаат никакви проблеми за снабдувањето во супермаркетите. Ве повикувам да ги погледнете нивните тековни состојби од претходната година, ниту една компанија не е оштетена од страна на Владата во нивните профити. Имавме одличен пример од домашен производител кој сам почна да ги намалува цените, без да чека 16 март. Се надевам дека сите други ќе го следат тој пример. Отстапки нема да има“, рече Бектеши.
Претходно премиерот Димитар Ковачевски и министерот за економија посочија дека за 15 проценти се намалува цената на тестенините, а за 10 цената на млечните производи.
