На социјалните мрежи се појави вознемирувачко видео на кое се гледа дете заврзано со јажиња околу вратот, рацете и нозете, наводно поради тоа што земало пари. Според коментарите под објавата, неофицијално, сторител на овој чин е таткото на детето.
По реакциите во јавноста, од Министерството за внатрешни работи информираат дека веднаш биле преземени мерки.
„Во врска со видеото кое се споделува по социјалните мрежи, Ве известуваме дека СВР Струмица веднаш презеде мерки. Откриен е идентитетот на сторителот и по консултација со јавен обвинител ќе биде поднесена кривична пријава за сторено кривично дело ‘насилство врз дете’ по член 201а од Кривичниот законик“, информираат од МВР.
Дополнително, за случајот е информиран и Центарот за социјални работи Струмица, по чии насоки детето е згрижено и предадено на мајката.
Случајот предизвика силни реакции во јавноста, со повици за остри санкции и поголема заштита на децата од насилство.
