Вечерва е подметнат пожар во депонијата близу Арачиново, покрај стариот пат кон Куманово. Иако депонијата е оградена и има влезна врата, скопските пожарникари ја затекнале вратата отворена. Во депонијата имало поголема количина на пакуван сончоглед кој горел со силен пламен, како и други горливи производи.
Најверојатно, намерното запалување на сончогледот предизвикало опожарување на дел од депонијата.
„Поради насоката на струењето на воздухот, смрдеата од пожарот најверојатно се чувствува во делови од Скопје“, вели директорот на Дирекцијата за заштита и спасување (ДЗС), Стојанче Ангелов.
Гаснењето е сложено поради обемот на зафатената површина, што го компликува гаснењето со вода или пена. Се прави проценка за неопходноста од затрупување на депонијата, која е под надлежност на Општина Арачиново.
