Организацијата за човекови права Амнести Интернешнл денеска го осуди израелскиот предлог за преселување на Палестинците во „хуманитарен град“ во урнатините на Рафа, велејќи дека тоа претставува „декларација за намера да се извршат воени злосторства и злосторства против човештвото“.
„Преселувањето на Палестинците во Газа, или нивната депортација против нивна волја, би претставувало воено злосторство на незаконско преместување или депортација. Покрај тоа, кога е извршено како дел од широко распространет или систематски напад врз цивилното население, тоа исто така би претставувало злосторство против човештвото“, соопшти Амнести на X.
Организацијата додаде дека меѓународната заедница не смее да даде поддршка на незаконското разместување и депортација на Палестинците, бидејќи во спротивно би била соучесник „во меѓународните злосторства на Израел“.
„Тоа што ваквите закани за извршување воени злосторства и злосторства против човештвото се изрекуваат толку бесрамно е симптом на неуспехот на светските лидери да ги повикаат Израел и неговите лидери на одговорност за геноцид и други злосторства“, се додава во соопштението.
Претходно оваа недела, израелскиот министер за одбрана Израел Кац најави план за преместување на до 600.000 Палестинци од Газа во одредено „хуманитарно подрачје“ во урнатините на јужниот град Рафа. Пристапот до кампот би бил можен со строги безбедносни проверки за да се осигури дека тие што ќе влезат не се оперативци на Хамас.
Кац рече дека израелската војска ќе го затвори тоа подрачје и оти на Палестинците нема да им биде дозволено да излезат, а планот е таму на крајот да се сместат сите 2,1 милион Палестинци кои моментално живеат во Појасот Газа.
