Американскиот портал „Трилист“, кој покрива теми за храна, напитоци, патувања и забава, објави напис со наслов „15 места за соло патување на животот“ (15 Places to Take the Solo Trip of a Lifetime).
Порталот посочува дека е важно понекогаш да отидете на патување сами за да можете да си удоволите и да си ги исполните желбите без да морате да ги земате предвид желбите на вашите придружници.
На листата има различни дестинации, од мали скапоцени гратчиња до раздвижени престолнини каде што изгубеноста е дел од авантурата, велат авторите на текстот.
Така, на листата се најдоа градови како Севиља во Шпанија, Рединг во Калифорнија, Бангкок, Париз, Атина, Берлин… Спомнати се земји како Велс, Белгија, Ирска, Мароко и Хрватска.
Што се однесува на Хрватска како една од идеалните дестинации за соло патување, истакнати се некои градови кои вреди да се посетат. „Дубровник може да биде малку поскап. На крајот на краиштата, тој е еден од најпосетените хрватски градови. Но, ако возите по хрватското далматинско крајбрежје, ќе најдете убави вина, сирења, морски плодови и места за сончање кои би можеле само да ги посакате,“ се наведува во текстот. Го споменуваат и Паг, Задар и Стон.
