Американското Министерство за одбрана во иднина би можело да активира до 3.000 резервисти за да ги распореди во Европа откако американскиот претседател Џо Бајден во четвртокот потпиша наредба за зајакнување на активните сили за спроведување на операцијата „Атлантска решеност“.
Американската војска ја почна мисијата по руската анексија на Крим во 2014 година, која го прекрши меѓународното право. Мисијата има цел да ги зајакне НАТО-сојузниците со распоредување борбено подготвени единици на ротациска основа на источното крило на НАТО.
Не станува збор за дополнителни сили, изјави за новинарите американскиот генерал-полковник Даглас Симс. Резервистите во иднина би можеле да ги преземат задачите што претходно ги извршувале војниците од активната единица.
