Амбасадорот на Кина во Белград, Ли Минг, наведува дека обидите на некои земји да се мешаат во кинеско-српската соработка претставуваат блоковска политика и судири на табори, како и одраз на „размислување од Студената војна“. Во интервју за најновиот број на НИН тој вели дека тие земји, наместо неоправдано да ги критикуваат другите, треба да го заземат правилниот пристап и да дадат вистински придонес во развојот на Србија.
Ли Минг изјави дека економската и трговската соработка на Кина со која било земја или регион во светот, вклучително и Србија, никогаш не е водена од геополитичка конкуренција или целта за воспоставување „сфера на влијание“, туку е насочена кон заемна корист и заеднички развој.
„Сите земји имаат право самостојно да го изберат својот пат на развој, како и слободно да ги изберат своите партнери за соработка. Соработката меѓу земјите треба да биде величествена симфонија на хармонија, а не затворени и ексклузивни кругови“, рече Ли Манг.
Во врска со американската забрана за увоз на производи на „Линглонг“ од фабрика во Србија и воведувањето ограничувања на квотите и високи тарифи за увоз на кинески челик од ЕУ, кинескиот амбасадор изјави дека ова се типични примери на протекционистички мерки, што се спротивни на принципите на пазарната економија и правилата на меѓународната трговија.
Според него, таквите мерки не само што ги поткопуваат стабилноста на регионалните индустриски синџири и економскиот развој туку и не придонесуваат за подобрување на сопствената индустриска структура и зголемување на конкурентноста.
„Кина постојано се залага за решавање на несогласувањата преку дијалог и консултации врз основа на пазарните принципи и економските закони, се спротивставува на политизацијата и прекумерната секјуритизација на трговските прашања и очекува релевантните страни да ги набљудуваат кинеските компании и кинеско-српската соработка со поголема отвореност и рационалност верувајќи дека граѓаните во Србија нема да бидат заведени од индивидуални антикинески наративи“, рече Ли.
