Лидерот на ДУИ, Али Ахмети, денеска на брифинг со новинарите упати остри и недвосмислени пораки до политичките опоненти, но и до незадоволниците во сопствените редови. Тој најави воведување нови, ригорозни услови за учество во идна влада, предупредувајќи дека доколку политичките процеси не се одвиваат според „Планот А“, не ја исклучува можноста за активирање на „Планот Б“.
Во свој препознатлив стил, Ахмети испрати силна порака за сопствената политичка тежина и поддршката што ја има. „Ако излезам на улица, никогаш нема да се вратам дома. Јас не сум претставник на мачки, туку на лавови“, изјави тој, потенцирајќи дека зад себе има сериозна политичка и општествена сила.
Тој се наврати и на своето минато, тврдејќи дека никој во земјава подобро од него не го познава национализмот. Според Ахмети, неговата улога во историските процеси на крајот на минатиот век и почетокот на овој е клучна, нагласувајќи дека со години активно учествувал во обликувањето на политичките текови во државата.
Во однос на идните коалиции, лидерот на ДУИ постави јасни „црвени линии“. Тој побара нов Национален договор за развој, кој би вклучувал системски измени, меѓу кои воведување двојно мнозинство, односно Бадентеров принцип, при избор на Владата, како и негова примена при одлучувањето во Уставниот суд. Според него, овие услови ќе бидат неопходни за учество на ДУИ во каква било идна власт, додавајќи дека Охридскиот рамковен договор е компромисен и остава простор за надградба.
Ахмети се осврна и на внатрепартиските случувања по Петтиот конгрес, минимизирајќи го незадоволството и оценувајќи дека станува збор за „две-три лица“ кои останале без функции. „Оние што си одат затоа што немаат функции, нека си одат“, порача тој, додавајќи дека Абдил Селам Селами веќе се извинил и останува дел од партијата.
Говорејќи за односите во рамки на таканаречениот Европски фронт, Ахмети истакна дека со Мендух Тачи постои договор кој, според него, не му штети на Фронтот. За Зијадин Села оцени дека се обидува да изгради сопствен политички идентитет, бидејќи се чувствува во сенка на ДУИ, но не верува дека ќе го поддржи Невзат Бејта за градоначалник на Гостивар.
Лидерот на ДУИ упати критики и кон стопанските комори, обвинувајќи ги дека создаваат поделби и дека стојат зад поддршката на олигарсите. За наредниот период, Ахмети најави нов тематски конгрес напролет, на кој, по консултации со членството, ќе се дефинира новата идеолошка матрица на партијата.
