Скопје, 21 мај 2020 (МИА) – Нестабилно со пороен дожд и грмежи утринава е во Охридско-преспанскиот регион и во југоисточните делови од земјава.
Според информациите на Управата за хидрометеоролошки работи, најмногу дожд до 8 часот има наврнато во Крива Паланка – 15 литри на метар квадратен, како и во Тетово – 11 литри на метар квадратен, Скопје 8 литри, Крушево 6 и Охрид и Виница четири литри на метар квадратен.
Облачното и значително посвежото време со засилен, повремено и силен северен ветер ќе се задржи и денеска. Ќе има врнежи од дожд, особено претпладне, а во јужните делови тие ќе бидат пообилни, локално поројни и проследени со грмежи. Максималната температура ќе достигне до 22 степена. Во Скопје максималната температура ќе достигне до 18 степен.
Промената на времето е резултат на продорот на значително постудена воздушна маса што од вчера попладне создаде услови за пороен дожд, грмежи и повремено силен ветер во повеќе делови од државата особено во западните и северните делови. бак/
