Скопје, 12 мај 2020
Фондацијата Отворено општество – Македонија реагира на
повторниот обид за дискредитација на граѓанското општество
Фондацијата Отворено општество – Македонија повеќе од 27 години посветено работи
на создавање динамично и толерантно општество во кое граѓаните се свесни и
активни, а властите отчетни, општество во кое сите ќе имаат еднакви права и
можности, во кое граѓаните иницираат промени, општество во кое се почитува
различното мислење и се негува и развива критичката мисла.
Нашата долгогодишна поддршка за развој на граѓанското општество и демократските
процеси во државата е со крајна цел промоција на вредностите на отвореното
општество и таа ќе продолжи и понатаму, без разлика која партија или политичка
гарнитура е на власт. Нашите вредности, залагања и нашата работа не зависат и нема
да дозволиме да зависат од желбите и амбициите на поединци или политички
групации, како и од неумесните изјави за дискредитација и етикетирање на
граѓанските организации.
Фондацијата низ сите премрежја и кризи почнувајќи од 1992 кога земјата се соочуваше
со затворени граници, преку годините во кои беше изложена и на прогон, па сè до
последната здравствена криза, ги става на располагање сите свои ресурси, а сè со цел
унапредување на отвореното општество и неговите вредности. Од 1992 до денес
Фондацијата Отворено општество – Македонија континуирано вложува во
демократизација на македонското општество и подобрување на животот на граѓаните,
оддолевајќи на сите досегашни бројни обиди за дискредитација и етикетирање.
Нашата работа го издржува и ќе го издржи тестот на времето. Затоа, ние и понатаму ќе
останеме посветени на промоција на вредностите на отвореното општество, будно ќе
ги мониторираме властите и гласно ќе соопштуваме во функција на коригирање на
нивните погрешни политики и активности кои ќе ги доведат во прашање
демократските процеси. Продолжуваме со нашата поддршка на граѓанското општество
со цел зајакнување на владеењето на правото, почитување и заштита на човековите
права, слобода на говорот, младинската ангажираност, натамошен развој на
граѓанското општество, унапредување на здравството и образованието, интеграцијата
на Ромите и на другите маргинализирани заедници, поттикнување на борбата против
корупцијата, но и пристап до правда за сите граѓани подеднакво.
Фондацијата Отворено општество – Македонија
___________________________________________________________
МИА овие текстови ги објавува во интегрална и оригинална форма и не е одговорна за нивната содржина, ниту за евентуалните правописни недоследности или печатни грешки.
