Кичево,11 мај 2020 (МИА) – Кичевското Муфтиство по повод најавеното утрешно отворање на џамиите информира дека ги преземале сите неопходни мерки за заштита на здравјето на луѓето и за спречување на ширењето на Ковид-19.
Ќамил Рушити, секретар на Муфтиството во Кичево истакна дека пред утрешното отворање сите џамии веќе неколку пати се дезинфицирани и донеле неколку мерки за заштита.
– Пред утрешното отворање на џамиите ги преземавме сите неопходни мерки: дезинфицирани се џамиите, носењето маски е задолжително, чистење на рацете со средство за дезинфекција пред влезот на џамиите или носење раквици. Исто така, секој верник треба да има лично сежда со себе. Толку колку што е можно да се користат дворовите од џамиите за молитва, да се одржи физичката дистанца колку што е можно повеќе. Забрането е да се соберат во групи пред или по молитвите во просториите на џамијата, верските предавања да не бидат подолги од 10 минути, абдесот (миење на раце, нозе и образ) треба да се изврши дома, просторијата за абдес ќе биде затворена, максимално за да се избегнат поздравувањата со физички контакти, објасни Рушити. рз/фф/
