Тетово, 9 мај 2020 (МИА) – Тричлена делегација на општинска организација на Сојузот на борци од Тетово учествуваше на симболичното одбележување на Денот на победата над фашизмот и Денот на Европа. Тројцата членови на организацијата положија цвеќе пред Споменикот на револуцијата во Тетово.
-Одбележувањето на овој значаен датум Сојузот на Борци од Народноослободителната и антифашистичка војна од Тетово, секогаш ги организирал со масовно присуство на негови членови, граѓани поддржувачи, како и во присуство на поголем број на здруженија, организации и политички партии. Поради глобалната пандемија од коронавирусот, оваа година 9 Мај – Денот на победата над фашизмот го одбележуваме во несекојдневни, вонредни услови, изјави Јоцко Димитриевски, претседател на организацијата.
Оваа година се навршуваат 75 години од победата над фашизмот.
-Втората светска војна во која беше победен фашизмот е пресудна и за македонскиот народ, кој пред војната беше национално обеспреавен и угнетуван од соседите, за да на крајот создаде својата национална држава. Свесни за својата состојба Македонците но и другите националности од првиот ден на НОБ се вклучија во антифашистичката војна за национална и социјална слобода, истакна Димитриевски. ас/рп/
