Скопје, 29 април 2020 (МИА) – На патниот правец Кичево – Охрид кај село Врбјани денеска поради работи минирање во период од 12 до 15 часот сообраќајот ќе биде во прекин 10 до 15 минути.
До 1 мај затворен за сообраќај за сите видови возил е патниот правец Охрид – Ресен, преку националниот парк Галичица (врска со Р1307 Царина – врска со А3 и Р1301 – Трпејца).
АМСМ информира дека сообраќајот на патиштата се одвива по суви коловози и оти интензитетот на сообраќај на патните правци надвор од градските средини е умерен.
За македонски државјани се затворени сите гранични премини за излез од државата. Затворени се сите гранични премини за влез во државата за странски државјани, патници и возила, освен за транзит на товарни возила, за претставници на дипломатскиот кор и тие кои што ќе добијат соодветна дозвола од страна на МВР, а по претходно добиено мислење од страна на главниот координативен штаб.
АМСМ препорачува прилагодена брзина на движење, почитување на поставената сообраќајна сигнализација и исклучително внимателно управување со возилата, особено на патиштата низ клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево. ев/
