Крива Паланка, 23 април 2020 ( МИА) – Јавното претпријатие „Комуналец” од Крива Паланка набави нови 40 пластични контејнери кои се поставени на повеќе локации во централното градско подрачје.
Набавката е извршена согласно годишната програма за работа и планот за јавни набавки на ЈП „Комуналец” за тековната година.
-Новите пластични контејнери се распоредени на повеќе локации низ централното градско подрачје. Со ова значително се подобрува комуналната инфраструктура и услугите за собирање и депонирање смет. Садовите за отпад се поставени на локации на кои во изминатиот период беше констатирано дека се генерираат поголеми количини отпад, информира директорот на ЈП „Комуналец”, Крива Паланка, Миле Марковски.
Од локалната самоуправа на Општина Крива Паланка посочуваат дека во следниот период со стратегијата за регионално управување со отпад, општината ќе добие донација од 192 садови за отпад, со што целосно би се задоволиле потребите на јавното комунално претпријатие на подолг временски рок. иб/ир
