Прилеп, 21 април 2020 (МИА) – Прилеп ја продолжи акцијата за делење заштитни маски на граѓаните, што ја започна за велигденските празници, а со оглед на мерките на Владата според кои од утре сите граѓани надвор од домовите, на отворено или во затворен простор треба да носат маски и ракавици, шалови, марами и други заштитни средства. Ова е еден од заклучоците на приелпскиот кризен штаб кој, поради превентивна заштита, денеска седницата првпат ја одржа он-лајн.
Според прилепскиот градоначалник Илија Јованоски, кризниот штаб ја разгледа моменталната ситуација во градот и донесе препораки.
-Дискутиравме за новите мерки што ги донесе Владата на Република Северна Македонија, а кои се однесуваат на трите најпогодени општини од коронавирусот, помеѓу кои се наоѓа и општина Прилеп. Прво и најважно, од утре среда 22 април, се воведува мерка за забрана за движење на населението на подрачјето на општина Прилеп без носење соодветна заштитна опрема – маска, шал, марама и слично, надвор од своите деомови, на сите јавни места и површини од отворен и затворен тип, како и затворени простории, маркети, продавници, изјави Јованоски.
Општината им препорачува на граѓаните да го редуцираат излегувањето од своите домови. Тоа да го прават само од најнеопходни причини и излегување од домот на само еден член од семејството, поради купување намирници и лекови од маркетите и аптеките. Со полицијата од утре е подготвен посебен оперативен план
-Оперативниот план се однесува на присуството и дејствувањето на полицијата на подрачјето на општината преку засилени патроли и засилено присуство, користење на мегафонска опрема на јавните места и површините за контрола за почитувањето на одлуките, мерките и препораките донесени од Владата, вели Јованоски.
Јованоски упатува пофалба до прилепчани за почитувањето на мерките. Инаку, до овој момент нема регистрирано новозаболени лица од корона вирусот. Во Инфективното оддление се хоспитализирани 24 пациенти. Деветнаесет од нив се позитивни на коронавирус, од кои тројца се на кислородна поддршка, а пет пациенти се наоѓаат во изолација, земен им е брис и се чекаат резултати. Досега, во Центарот за јавно здравје вкупно се земени 460 материјали, од кои 117 биле позитивни.
Во Прилеп има седум целосно излекувани пациенти, со потврдени два последователно негативни брисови на КОВИД-19. Шест пациенти се со еден потврден негативен брис, а за вториот се чека резултат.
Во самоизолација се наоѓаат околу 500 лица.ем/скс/
