Штип, 13 април 2020 (МИА) – Штипската Клиничка болница набави нова заштитна опрема за вработените. Директорот, Ален Ѓеорѓијев за МИА вели дека тендерската постапка е завршена, со што е обезбедена заштитна опрема за наредниот период за вработените во болницата.
Набавени се 30.000 капи, 50.000 калјачи, 100.000 хируршки маски и 900 хируршки мантили. Болницата има потреба од 10.000 хирушки мантили, но очекуваме во текот на оваа недела да се набават и дополнителните мантили, вели Ѓеорѓијев.
Вработените на Инфективното одделение во Штип денеска до МИА испратија фотографии од внатре во самото одделение и со каква заштитна опрема се грижат за пациентите кои се хоспитализираат од општините од источниот регион. Во моментов на ова одделение има пациенти од Штип, Кочани, Зрновци и Чешиново-Облешево. Ѓеорѓијев рече дека за пациентите се грижат двајца инфектолози од Штип и Струмица и еден специјализант, а од Министерството за здравство имаат најава дека на помош деновиве ќе им пристигне и инфектолог од Кочани.
Во моментов на Инфективното одделение се хоспитализирани вкупно 13 пациенти, од кои девет се позитивни на Ковид 19 и се со средна клиничка слика, а за останaтите четворица пациенти, кои се со сомнителни симптоми се чекаат резултатите од брисовите.
Во текот на минатата недела пристигнати се 300 скафандери, а се платени од општествено одговорните компании „Биомедика“ од Скопје и од радовишкиот рудник за бакар и злато „Бучим“.Ѓеорѓијев информира дека на донаторската сметка на Клиничка болница-Штип пристигнати се и 5.000 евра донација од спортската кладилница „Моцарт“. вдј/ир
