Скопје, 8 април 2020 (МИА) – Една петтина од јавните претпријатија имаат воспоставено политика за спречување на корупцијата, покажува истражувањето што го спроведе Институтот за демократија „Социетас Цивилис“.
Овој број пораснал во споредба со 2019 година кога само 7,7 проценти од претпријатијата одговориле дека имаат воспоставено вакви механизми.
Дополнителен проблем е тоа што вработените во јавните претпријатија дури и да забележат корупција на работното место, не можат да ја пријават. Осум од 49 претпријатија имаат овластено лице за пријавување на корупција, а само кај две претпријатија, овие лица работат во изолирана канцеларија од другите вработени.
Затоа, како што се наведува, е важно вработените да имаат каде и кому да пријават корупција и тоа да го направат тајно, безбедно и навремено.
Ваквите состојби, според анализата, се резултат на неинформираноста и непрепознавањето од бенефитите од воведувањето на системот за спречување на корупцијата кај повеќето јавни претпријатија.
Целата анализа може да се најде на веб-страницата на ИДСЦС https://idscs.org.mk/mk/2020/04/07/анализа-на-внатрешни-процедури-и-проц/.
Истражувањето е дел од проектот „Кон добро управување во државните претпријатија и независните тела” финансиран преку Владата на Обединетото Кралство. бак/ац/
