Штип, 18 март 2020 (МИА) – Градоначалникот на Општина Свети Николе, Сашо Велковски денеска одржа состанок со бизнис секторот. Тој истакна дека од страна на сопствениците на фабриките му е потенцирано дека во моментов има недостаток од заштитни маски, кои во вакви услови се неопходни за здравјето на работниците, кои се во реалниот сектор.
–На средбата се дискутираше и за превенцијата што ја преземаат фирмите околу дезинфекција и заштита на вработените. Се констататираше дека има недостаток на заштитни маски, но во наредниот период се надеваме дека ќе се обезбеди доволна количина за сите, вели Велковски.
Тој истакна дека од страна на производителите на леб и лебни пецива и големите маркети е потенцирано дека се снабдени со потребните количини на прехранбени производи и дека нема место за паника.
Општина Свети Николе покрај тоа што почна со дезинфекција на улиците и тротоарите во градот, во текот на денот ваква дезинфекција почна да врши и во руралните средини.вдј/скс/
