Тетово, 17 март 2020 (МИА) – Државниот пазарен инспекторат, со асистенција на СВР – Тетово, денеска во период 12 до 15 часот, постапи поради непочитување на мерките на Владата на РСМ, за справување со вирусот Ковид 19, информираат од прес службата на МВР. При оваа акција се затворени три угостителски објекти во Тетово и селото Пирок во Општина Боговиње.
– Во периодот од 12 до 15 часот и 30 минути полициски службеници во содејство со инспектори на Државен пазарен инспекторат (ДПИ), извршиле контрола и времено затвориле угостителски објект на улица Браќа Миладинови во Тетово, сопственост на 47 годишник од градот. Исто така затворени се уште две кафетерии во селото Пирок, Општина Боговиње, поради непочитување на владините одлуки, мерки и препораки во насока на спречување на ширење на коронавирусот, информира денеска Марјан Јосифоски, портпарол на СВР Тетово.
Сопствениците на угостителските објекти ќе се соочат со превидените законски санкции. Од СВР – Тетово, апелираат до придржување на одлуките на Владата. Потенцираат дека продолжуваат самостојните контроли како и заедничките акции со ДПИ во насока на тоа дали се почитуваат препораките на надлежните институции. ас/оџ/
