Крива Паланка, 10 март 2020, (МИА) – Подигнување на свеста на граѓаните за ефектите од локалната корупција е целта на денешниот отворен ден на Истражувачката репортерска лабораторија (ИРЛ) Скопје што се одржа во регионалната канцеларија на Црвен крст, Крива Паланка.
На отворениот ден граѓаните и граѓанските организации од Североисточниот плански регион имаа можност да разговараат со претседателката на Државната комисија за спречување корупција Билјана Ивановска и со главниот државен ревизор, Максмим Ацевски.
-Идејата е да ги охрабриме граѓаните од повеќето региони да говорат за проблемите. Почнавме од Североисточниот регион, како најсиромашен во државата, и штета е баш тој регион што бил на времето и најголем извозник на месо во Европа, што дознавме од граѓаните, регион кој се наоѓа на самата граница со Бугарија и ги има сите капацитети и потенцијали тука да се живее подобро, но не се живее подобро. Ние ги бараме одговорите зошто не се живее подобро, проблемите се во областа на владеење на правото, во корупцијата, и како што посочи државниот ревизор и во незнаењето и отсуството на вештини кои се последица на девастирањето на институциите веќе три децении, а ние сме тука да скенираме кои се проблемите, зошто сето ова се случува, зошто се иселуваат младите од Крива Паланка и да се бориме сите заедно како да се живее подобро, изјави Сашка Цветковска од ИРЛ.
Рече, партнери и голема подршка во активностите им се државниот главен ревизор, Максим Ацевски и неговиот тим, како и претседателката на Државната антикорупциска комисија, Билјана Ивановска.
-Идејата беше да се здружуваме со независните институции бидејќи граѓаните имаат поголема доверба во институциите кои се независни. Се вложи многу напор во изминатите три-четири години да ги зачуваме овие институции од партиските влијанија и ние како новинари да ја враќаме довербата и во институциите и во медиумите и заедно со граѓаните да помогнеме да се решат проблемите кои во моментов на сите ни се чинат нерешливи, но ние веруваме дека нема ништо посилно од здружените граѓани, затоа и наше мото е „Бори се со нас“, додаде Цветковска.
Државниот главен ревизор, Максим Ацевски рече дека Државниот завод за ревизија дава силна подршка на овие активности и ги смета граѓанските организации како партиципирање на НВО-секторот во борбата против корупцијата.
-Секогаш како досега, така и во наредниот период ќе даваме поддршка на сите невладини организации, чија стратешка цел е создавање транспарентно, отчетно и одговорно општество, изјави Ацевски.
Во рамки на отворениот ден со активности се вклучи и тим од Клубот на млади лекари, Скопје, делејќи бесплатни совети за граѓаните за заштита од коронавирусот, бесплатни мерења на притисок и општи здравствени совети.
Истражувачките новинари на ИРЛ ќе бидат присутни со активности во Североистокот во следниет две недели, по што продолжуваат во Полошкиот регион, во Тетово и Југоисточниот, во Струмица, со цел да анимираат граѓаните во борбата со корупцијата и криминалот и да се поддржат напорите на независните институции за расветлување локална корупција. ид/ац/
