Штип, 28 февруари 2020 (МИА) – Со излагања на двајца еминенти професори, од Грција и Бугарија, денеска во Штип почна меѓународниот научен симпозиум „Дерматологија 2020“ во организација на Факултетот за медицински науки при Универзитетот „Гоце Делчев“.
-Од областа на дерматовенерологијата ќе разговараме за многу теми, а почнуваме со излагањето на Николај Цанков, почесен професор на нашиот универзитет во Штип и дописен член на Бугарската академија на науките, едно од најмаркатните имиња во бугарската дерматовенерологија. Професорот Андреас Кацамбас, пак, од Грција е докажан пријател на факултетот и човек со огромно искуство, изјави универзитетскиот професор, Андреј Петров пред почетокот на симпозиумот.
Според професорите од Бугарија и Грција, на симпозиумот ќе бидат отворени најактуелните теми и проблеми во дерматологијата.
– Ќе зборуваме за најактуелните проблеми, а за некои од нив, сигурен сум, ќе се понудат и решенија, истакна професорот Цанков од Бугарија.
Професорот Кацамбас од Грција е втор пат во Штип. -Со задоволство следам како се развиваат Универзитетот и дерматологијата во оваа земја. Секоја година програмата е подобра и навистина е задоволство да се соработува со дерматолозите овде, истакна Кацамбас.
На научниот симпозиум што ќе продолжи утре во Скопје, учествуваат научници од сите делови на Балканот. вдј/мч/
