Македонска Каменица, 27 февруари 2020 (МИА) – Во каменичкиот Дом на култура отворена е изложбата од ликовниот уметник Верче Андонова. Пред посетителите Андонова, претстави дел од своите дела работени во т.н. арапска техника.
– Оваа техника ја научив додека бев штитеник во Домот за деца без родители во Скопје. Среќна сум, бидејќи со оваа изложба успеав да докажам дека и лицата со попреченост умеат да творат и создаваат, рече Андонова.
Настанот е во организација на Центарот за поддршка на лицата со интелектуална попреченост „Порака“ од Штип, со поддршка од Општина Македонска Каменица преку програмата за работа на Културно-информативниот центар „Романса“.
Преку ваквите настани, како што истакна градоначалничката Соња Стаменкова, која присуствуваше на отворањето на изложбата, општината ќе продолжи со постојаната поддршка и грижа кон лицата со посебни потреби и личните заложби, се со цел поголема инклузија на оваа група граѓани во општествениот и културен живот во Македонска Каменица и државата.
Авторката во знак на благодарност на организаторите им подари уметнички дела. Изложбата во Домот на култура, ќе биде отворена до крајот на месец март. вс/сп/
