-Во 2019 година, првпат од основањето на претпријатието, остваривме позитивен финансиски резултат и работевме со добивка од 600.000 денари во првиот квартал. И во останатите квартали се забележува тренд на позитивно работење. Ова се должи на зголемувањето на бројот на приклучоци и зголемената количина на дистрибуиран природен гас, изјави директорот на „Куманово Гас“, Никола Денковски.
Годинава, надлежните очекуваат да се зголеми бројот на нови приклучени физички и правни субјекти. Во тековната година се очекува кон дистрибуциската мрежа да се приклучат станбени едници во населбата „Зелен Рид“ со приближно 200 корисници.
-Останува да го реализираме проектот кој беше врвен приоритет и за претходната година, приклучување на болницата кон мрежата. Мора да истакнам дека доцнеше проектот кој го работи кумановско проектантско биро. Наш врвен приоритет е создавање на технички услови за приклучување на болницата на гасоводниот систем. Тоа значи дека ќе ги исполниме нашите обврски, останува и болницата да си ги доврши своите обврски, додава Денковски.
Надлежното претпријатие „Куманово-гас“ им дава можност на заинтересираните граѓани на 12 месечни рати да го платат приклучокот од осумстотини евра. Општина Куманово во рамките на програмата за намалување на аерозагадувањето нуди и субвенции од 10.000 денари за секој приклучок. ам/сст/
