Севилја, 20 февруари 2020 (МИА) – Португалскиот фудбалер Даниел Карико (31) реши да прекине соработка со Севилја и да потпише за Вухан. Трансферот претставува изненадување ако се има предвид дека градот се наоѓа во кинеската провинција Хубеи која е епицентар на корона-вирусот.
Карико, сепак, нема веднаш да отпатува во Кина, туку на рапорт во новиот клуб ќе се јави штом се создадат услови оти и фудбалското првенство на Кина е ставено во мирување на неодреден временски период.
Карико потекнува од фудбалската школа на Спортинг Лисабон за потоа да биде позајмуван во АЕЛ Лимасол и Оланенсе, а пред Севилја го носеше и дресот на Рединг во Англија. Член на Севилја беше од 2014 година. сѓд/сд/
