Пентагон ја одреди подморницата „Колорадо“ како прва американска напаѓачка подморница на нуклеарен погон што ќе се приклучи на ротационите сили стационирани во Западна Австралија.
Ова е дел од трилатералниот одбранбен пакт АУКУС, во кој учествува и Обединетото Кралство.
Подморницата од класата „Вирџинија“, долга 115 метри и вооружена со ракети и торпеда, ќе заплови кон својата нова база во Австралија кон крајот на следната година, соопштија денеска американски претставници. Ова распоредување претставува „важен чекор“ во изградбата на заеднички капацитет за одвраќање за САД, Австралија и Обединетото Кралство во регионот на Пацификот, наведоа трите сојузнички земји во заедничко соопштение.
Пактот АУКУС, кој се смета за одговор на зајакнувањето на воените капацитети на Кина во регионот, има за цел да ја опреми австралиската морнарица со флота од тешко забележливи подморници на нуклеарен погон, како и да ја продлабочи воената соработка меѓу трите нации.
„Ротационите подморнички сили – Запад“ ќе бидат стационирани во базата ХМАС „Стирлинг“ (HMAS Stirling) во Западна Австралија. Се очекува во оваа база да бидат сместени до пет напаѓачки подморници (четири од САД и една од Обединетото Кралство), со цел да ѝ помогнат на Австралија во подготовките за управување и одржување на нејзините идни подморници на нуклеарен погон.
