МЕПСО побара зголемување на просечната тарифа за пренос на електрична енергија за 97,68 проценти за 2027 година. Барањето е доставено до Регулаторната комисија за енергетика на 16 октомври, а предложената тарифа изнесува 0,5966 денари за киловат-час, покажува официјалното известување на РКЕ.
Сегашната тарифа изнесува 0,3018 денари за киловат-час, што значи дека МЕПСО бара зголемување од 0,2948 денари. Сепак, бараниот раст на преносната тарифа не значи дека сметките на домаќинствата ќе се зголемат за истиот процент, бидејќи преносот е само една компонента на крајната цена на струјата.
Според документот објавен од регулаторот, МЕПСО бара регулиран максимален приход од околу 3,39 милијарди денари за следната година. Планираното количество електрична енергија на излез од преносната мрежа изнесува приближно 5,68 милијарди киловат-часови.
Станува збор за барање на компанијата, а не за веќе одобрено поскапување. РКЕ допрва треба да утврди колкав приход и каква тарифа ќе одобри. Заинтересираните граѓани и компании можат да достават мислења и предлози до 29 октомври, до 12 часот.
Во илустративната пресметка што ја објави „Рацин“, целосното прифаќање и пренесување на разликата врз домаќинствата би значело околу 139 денари дополнително за потрошувачка од 400 киловат-часови, со вклучен ДДВ од 18 проценти. Ова не е официјална проекција: конечниот ефект ќе зависи од одобрените тарифи и распределбата на трошоците.
