Закана со бомба на лет од Тел Авив кон Виена предизвикала вистинска драма во воздухот, откако патнички авион на австриската авиокомпанија „Аустриан ерлајнс“ синоќа бил принуден да го прекине летот и да слета на аеродромот во Софија, пренесува германската новинска агенција ДПА.
Во авионот од типот „Ербас А320“ се наоѓале вкупно 57 лица, од кои 51 патник и шест членови на екипажот.
Според израелските медиуми, сомнежот за поставена експлозивна направа се појавил по полетувањето од Тел Авив, додека авионот се наоѓал во близина на бугарско-романската граница.
Поради безбедносната закана, била донесена одлука авионот да се пренасочи кон главниот град на Бугарија, каде што биле преземени неопходните безбедносни мерки.
По завршувањето на проверките, предвидено е патниците да бидат префрлени на други летови за да го продолжат патувањето кон својата дестинација.
Инцидентот доаѓа по уште еден сериозен настан во авионскиот сообраќај поврзан со лет кон Израел.
На 30 септември, според претходно објавените информации, на лет на авиокомпанијата „Флајдубаи“ од Дубаи кон Тел Авив, копилотот наводно го нападнал капетанот со секира, по што авионот почнал нагло да губи висина.
Капетанот, индиски државјанин, бил тешко повреден, но успеал да ја отвори вратата на пилотската кабина. Патниците и членовите на екипажот потоа го совладале напаѓачот, а авионот принудно слетал во Табук, Саудиска Арабија.
Според наводите што им се припишуваат на истражителите во Обединетите Арапски Емирати, копилотот, државјанин на Оман, планирал да го урне авионот на аеродромот „Бен Гурион“, во близина на Тел Авив.
