Вистинска драма се случила во зоолошкиот парк „Yorkshire Wildlife Park“, во близина на Донкастер, на северот на Англија, каде што маж бил усмртен од тигар откако влегол во оградениот простор со опасните животни. Инцидентот предизвикал паника меѓу посетителите, по што паркот бил итно евакуиран, а на местото пристигнале бројни полициски екипи, амбулантни возила и медицински хеликоптер.
Како што објави британскиот јавен сервис Би-би-си, жртвата е идентификувана како Вилијам Чепмен, кој во саботата, нешто по 13:30 часот по локално време, влегол во просторот со тигрите, каде што бил нападнат од едно од животните. Од здобиените повреди починал на самото место, потврдила полицијата на Јужен Јоркшир.
Според сведочењата на посетителите, мажот непосредно пред трагедијата се движел напред-назад во близина на заштитната ограда. Еден очевидец раскажал дека Чепмен носел слушалки на ушите, додека други сведоци тврдат дека изгледал видно вознемирен.
Во еден момент, според нивните сведочења, мажот ја прескокнал оградата и влегол меѓу тигрите. Набргу потоа, едно од животните го нападнало.
Неколку посетители тврдат дека по нападот слушнале пет истрели, но не е официјално потврдено дали станувало збор за вистински куршуми или за употреба на средства за одвраќање на животните.
Веднаш по инцидентот биле активирани итните безбедносни процедури. На местото пристигнале голем број полицајци и медицински лица, две амбулантни возила, лекар и медицински хеликоптер.
Просторот со тигрите бил ограден со големи црни церади за посетителите да не можат да гледаат што се случува, додека вработените започнале со евакуација на зоолошкиот парк.
Тија Хансон, која во моментот на трагедијата била во паркот со своја пријателка, раскажала дека околу 14 часот бил затворен преминот меѓу просторот со тигрите и излезот.
„Изгледа дека некој скокнал во просторот со тигрите, па морале да пукаат. Луѓето зборуваа дека слушнале истрел и дека некој скокнал или паднал внатре“, изјавила Хансон за британските медиуми.
Таа опишала дека ситуацијата била исклучително вознемирувачка, а дел од посетителите биле во шок од она што се случувало.
„Полицијата беше насекаде, а слета и медицински хеликоптер. Сите нè упатија кон излезот. На патот мораше да поминеме покрај просторот со тигрите, но поставија црни церади за ништо да не се гледа. Сепак, видовме многу полицајци и медицински лица, а внатре имаше и носила. Глетката беше непријатна, многу луѓе беа видно потресени“, раскажала таа.
Од управата на „Yorkshire Wildlife Park“ потврдиле дека се случил сериозен инцидент и дека веднаш биле преземени сите неопходни мерки.
„Можеме да потврдиме дека се случи сериозен инцидент кај просторот со тигрите. Веднаш ги активиравме итните процедури и на местото пристигнаа службите за итна помош. Тесно соработуваме со надлежните институции за да утврдиме што точно се случило. Безбедноста и благосостојбата на нашите посетители, вработени и животни се наш најголем приоритет“, соопштиле од паркот.
Полицијата потврдила дека Чепмен сам го посетил зоолошкиот парк и дека неговото семејство е известено за трагедијата. На најблиските им е обезбедена поддршка од специјализирани полициски службеници.
По нападот се појавиле шпекулации дека тигарот бил застрелан, но управата на паркот подоцна потврдила дека животното не било усмртено.
Станува збор за редок амурски тигар по име Алтај, кој по инцидентот останал во својот ограден простор. Од зоолошкиот парк соопштиле дека тигарот нема да биде еутаназиран.
Управата изразила длабоко сочувство до семејството на починатиот, нагласувајќи дека соработува со надлежните служби во истрагата.
Покрај полициската истрага, Градскиот совет на Донкастер започнал и посебна постапка за проверка на здравствените и безбедносните мерки во зоолошкиот парк. Од советот соопштиле дека истрагата се спроведува во согласност со законските обврски.
Доктор Кембел Мурн, поранешен член на владиниот стручен комитет за зоолошки градини и предавач на Универзитетот во Рединг, изјавил дека станува збор за трагичен настан, но дека дури и најдобрите безбедносни системи не можат целосно да спречат лице кое е решено да влезе во забранет простор.
„На ова гледам исто како кога решителен крадец успева да влезе во нечија куќа или автомобил. И покрај најдобрите безбедносни системи и заштитни огради, понекогаш се случуваат вакви работи“, изјавил Мурн.
Зоолошкиот парк останал затворен по трагедијата, додека полицијата и надлежните институции продолжуваат да ги утврдуваат сите околности на случајот, вклучително и како Чепмен успеал да влезе во просторот со тигрите и дали биле почитувани сите пропишани безбедносни процедури.
