Пепел, поцрнети метални конструкции, стопени фасади и целосно уништени дуќани – ваква е сликата денеска во Шуто Оризари, по големиот пожар што рано утрово зафати трговски центар и зад себе остави огромна материјална штета.
Според информациите од Министерството за внатрешни работи, пожарот бил пријавен на 11 септември 2026 година околу 03:20 часот во СВР Скопје. Во трговскиот центар на подрачјето на Шуто Оризари биле опожарени повеќе од 20 дуќани со текстилна и друга роба.
Објектите се сопственост на С.С., кој ги издавал под закуп.
На терен интервенирала Бригадата за противпожарна заштита – Скопје, чии екипи успеале да го изгаснат пожарот.
По повлекувањето на огнената стихија останала пустош. На местото се гледаат изгорени метални конструкции, уништени покриви и излози, стопени делови од фасадите и купишта пепел и изгорена роба.
Фотографиите направени по пожарот најдобро го покажуваат обемот на штетата. Повеќе дуќани се сериозно оштетени, а дел од нив се практично целосно уништени од пламените јазици.
За среќа, во пожарот нема повредени лица.
Причината за избувнувањето на пожарот засега не е позната. Надлежните институции преземаат мерки за расчистување на случајот и утврдување на причините што довеле до пожарот.
