Израел објави дека го уби новоназначениот командант на вооруженото крило на Хамас во Газа, десет дена откако го уби неговиот претходник.
Израелската војска соопшти дека Мохамад Одех е убиен во воена операција во Газа во вторник. Роднина на командантот ја потврди неговата смрт за Ројтерс и рече дека погребот ќе се одржи во Газа по пладневната молитва. Хамас сè уште не издаде официјално соопштение, но во соопштението од неговото семејство се вели дека тој е убиен заедно со неговата сопруга и син.
Здравствените служби во Газа објавија дека најмалку шест лица се убиени, а 20 се ранети во израелскиот напад во областа Римал. Спасувачките служби се уште се на терен, пишува Ројтерс.
Неодамна назначен командант
Израелскиот премиер Бенјамин Нетанјаху во вторникот изјави дека Одех бил шеф на разузнавањето на Хамас на денот на терористичкиот напад на милитантната група врз Израел на 7 октомври 2023 година.
Нетанјаху додаде дека Одех бил назначен пред околу една недела за наследник на Из ал-Дин ал-Хадад, врховниот воен командант на групата, кој беше убиен од Израел на 15 мај.
Извори блиски до Хамас не го потврдија назначувањето, но се согласија дека тој се смета за можен наследник на Хадад бидејќи бил шеф на военото разузнавање и веројатно последниот преживеан член на високото раководство на вооруженото крило.
Неколку часа пред нападот, Израел објави и дека ги проширил копнените операции во Либан. Израел, исто така, ги засилува своите воени активности на Западниот Брег.
