Унгарскиот мандатор за премиер Петер Маѓар вчера ја бранеше својата одлука да го назначи својот зет Мартон Мелетеј-Барна за министер за правда, велејќи дека професионалната компетентност на адвокатот е „несомнена“. Маѓар призна дека одлуката, со оглед на тоа што идниот министер е сопруг на неговата сестра, „создала сериозна дилема“ за него и дека јавната загриженост е „разбирлива“.
За да се избегне, според него, појавата на преплетување на гранките на власта, Маѓар објави дека неговата сестра Ана Илона Мелетеј-Барна, сопруга на идниот министер, ќе направи „уште една жртва“ и ќе се повлече од својата позиција како судија. Тој тврдеше дека неговиот зет бил дел од движењето Тиса од самиот почеток и дека неговиот избор бил објективен.
„Го познавам долго време. Мојата одлука се темелеше на неговата подготвеност и посветеност на владеењето на правото“, рече Маѓар. Тој нагласи дека одлуката не била „политичка пресметка, туку примарното прашање било: кој би можел да ја претставува програмата на функционална и хумана Унгарија со најголема подготвеност и морална убеденост, со непоколеблива искреност?“
„Фидес го уништи владеењето на правото, а правната сигурност и еднаквоста пред законот престанаа да постојат во Унгарија. За да го решам сето ова, барав личност способна да ја изврши оваа огромна, историска задача и чија професионална компетентност е несомнена“, додаде тој.
