Најмалку две деца умираат од убодни рани секој месец во Англија, покажа ново национално истражување, истакнувајќи загрижувачки пораст на насилството кај младите и сериозни пропусти во раната интервенција. Првата анализа од ваков вид откри дека смртните случаи од нож кај лица под 17 години се зголемиле од 21 во 2019/20 година на 36 во 2023/2024 година, што е во просек од најмалку две деца месечно, објави Скај.
Повеќето од жртвите биле момчиња, со просечна возраст од околу 14 години, а многу од нив потекнувале од посиромашни и социјално понеповолни средини. Истражувањето, кое се базира на податоци од Националната база на податоци за смртност кај децата и болничките, социјалните и полициските евиденции, опфатило вкупно 145 смртни случаи во период од пет години.
Дури 90 проценти од жртвите биле момчиња, додека етнички гледано, приближно една третина биле црни деца, а една третина биле бели деца. Особено загрижувачки е фактот што 75 проценти од убиените деца потекнуваат од најсиромашните делови на земјата.
Жртвите се сиромашни момчиња
Кога податоците се споредуваат со големината на населението, црните деца имаат околу 13 пати поголема веројатност да умрат од убодни рани отколку нивните бели врсници. Истражувачите, исто така, пронајдоа силна врска помеѓу насилството и тешките услови за живот во кои децата растеле.
Една четвртина од жртвите живееле со возрасно лице со проблеми со менталното здравје, додека една третина доаѓала од домаќинства погодени од злоупотреба на алкохол или дрога. Припадност кон банди била спомената и во една третина од случаите, а примерите на семејно насилство и злоупотреба биле чести.
Водечкиот автор на студијата, д-р Том Робертс, лекар по итна медицинска помош, предупреди дека податоците јасно укажуваат на итна потреба од рана и насочена интервенција. Тој истакна дека многу деца биле во контакт со разни институции, но и покрај тоа не добиле соодветна поддршка за справување со негативните искуства од детството, особено во контекст на семејно насилство и злоупотреба. Ваквите неуспеси, предупредува тој, откриваат сериозни празнини во системот за заштита на децата.
