Неколку воени бродови на американската морнарица денеска поминаа низ Ормускиот теснец, потврди американски функционер. Овој потег, кој не бил координиран со Иран, го означува првото минување на американски воени бродови низ теснецот од почетокот на војната, пишува „Аксиос“.
Според извори, целта на операцијата била да се поттикне довербата кај трговските бродови да продолжат со пловидбата. Операцијата е изведена во момент кога во Пакистан започнуваат мировни преговори меѓу двете страни. „Станува збор за операција чија цел е да се обезбеди слобода на пловидба во меѓународните води“, изјави американски функционер.
Иран: Американски разорувач се повлекол од Ормускиот теснец по предупредување
Иран, пак, соопшти дека американски разорувач се повлекол од Ормускиот теснец откако му било упатено остро предупредување. Според иранските наводи, вооружените сили го забележале движењето на воениот брод од пристаништето Фуџаира и за тоа ја известиле својата преговарачка делегација, пишува „Тасним“.
Техеран потоа преку пакистански посредник порача дека разорувачот ќе биде нападнат во рок од 30 минути доколку продолжи да се движи кон теснецот. Набргу потоа, американскиот брод го запрел движењето, а потоа и се повлекол, што иранската страна го припишува на својата решителна реакција и упатените предупредувања.
Клучна точка на примирјето
Повторното отворање на теснецот е клучна ставка во договорот за прекин на огнот меѓу САД и Иран. Овој тесен пловен пат долж јужниот брег на Иран е од пресудно значење за нормалното функционирање на глобалната економија.
Сепак, во деновите по прогласувањето на примирјето, многу мал број бродови поминале низ теснецот. Еден американски функционер претходно оваа недела призна дека бродовите не минувале поради заплашување од страна на Иран.
Трамп најави расчистување на мини
Претседателот Трамп на социјалната мрежа Truth Social објави дека заканата дека бродовите би можеле да налетаат на морски мини била единственото средство со кое Иран ги одвраќал од минување низ теснецот.
„Сега започнуваме процес на расчистување на Ормускиот теснец како услуга за земјите ширум светот, вклучувајќи ги Кина, Јапонија, Јужна Кореја, Франција, Германија и многу други“, напиша тој.
