Премиерот Христијан Мицкоски преку објава на Фејсбук информираше дека вечерва присуствувал на Самит на лидери во организација на Европската народна партија (ЕПП), каде учествувале претседатели на политички партии од ова европско политичко семејство.
На самитот се обратиле повеќе лидери од Европската Унија, при што биле отворени клучни теми поврзани со економската перспектива на континентот, како и актуелните глобални предизвици.
Меѓу нив, како што посочува Мицкоски, доминирале дискусиите за војната во Украина, конфликтите во Заливот и ситуацијата во Иран, кои имаат значително влијание врз безбедноста и стабилноста на Европа.
Дополнително, учесниците разговарале и за потребата од зголемување на конкурентноста, како и за креирање стратегии за одржлив економски развој на европските економии.
