Поранешниот принц Ендру, чие целосно име е Ендру Маунтбатен-Виндзор, е уапсен под сомнение за злоупотреба на јавна функција, соопшти британската полиција.
Полицијата соопшти дека тој е во притвор и дека се вршат претреси на адреси во окрузите Беркшир и Норфолк. Фотографиите направени утрово покажуваат возила како пристигнуваат во имотот Сандрингам во Норфолк, јавува Би-Би-Си.
Апсењето доаѓа откако полицијата во долината Темза објави дека разгледува жалба за поранешниот принц кој наводно споделувал доверливи материјали со покојниот повеќекратен сексуален престапник Џефри Епштајн.
Ендру, кој денес полни 66 години, во повеќе наврати цврсто ги негираше сите обвинувања за недолично однесување.
Полицијата од долината Темза го објави следново соопштение:
„Како дел од истрагата, денес (19/2) уапсивме маж во шеесеттите години од Норфолк под сомнение за злоупотреба на јавна функција и вршиме претреси на адреси во Беркшир и Норфолк.
Мажот моментално е во полициски притвор.
„Нема да го именуваме уапсениот маж, во согласност со националните упатства. Исто така, ве потсетуваме дека случајот е моментално активен и дека треба да се биде претпазлив во објавите за да се избегне непочитување на судот.“
Помошникот началник на полицијата Оливер Рајт изјави:
„По темелна проценка, сега започнавме истрага за оваа наводна злоупотреба на јавна функција.“
Важно е да се заштити интегритетот и објективноста на нашата истрага додека ние, во соработка со нашите партнери, го истражуваме наводното кривично дело.
Свесни сме за големиот јавен интерес во овој случај и ќе обезбедиме дополнителни информации во соодветно време.“
