Дали некогаш сте се запрашале како паровите кои се заедно со децении успеваат да ја одржат својата врска? Долгорочните односи неизбежно минуваат низ подеми и падови, а понекогаш предизвиците изгледаат непремостливи. Според психологот д-р Александра Соломон, клучот за здрава и стабилна врска е подготвеноста партнерите да ја гледаат својата врска како место за учење и личен развој.
„Мораме да прифатиме дека промената е неизбежна и најдоброто што можеме да го направиме е да и пристапиме со љубопитност, наместо со отпор“, вели д-р Соломон. Таа објаснува дека секој партнер во врската го носи своето минато, старите рани и обрасци на однесување, па затоа е важно тие да се препознаат и разберат, наместо да станат причина за конфликти.
Еден од најважните аспекти за здрава врска е грижата за себе. Според Соломон, добриот партнер започнува со задоволување на сопствените основни потреби доволно сон, здрава исхрана, физичка активност и управување со стресот. Кога луѓето се исцрпени, полесно стануваат раздразливи и ги доживуваат секојдневните обврски како товар, што негативно се одразува и на односот со партнерот. Затоа, важно е секој да најде време за активности што носат радост и чувство на исполнетост.
Допирот, исто така, игра значајна улога во одржувањето на блискоста. Според д-р Соломон, нежните и секојдневни гестови како држење за рака, прегратка или седење блиску еден до друг создаваат чувство на сигурност и поврзаност, без нужно да имаат сексуална конотација. Таквите мали моменти помагаат да се намали стресот и да се зајакне емоционалната врска меѓу партнерите.
Психологот ја нагласува и важноста на времето поминато насамо со партнерот, особено кај паровите кои имаат деца или динамична работа. Состанокот не мора да биде скап или комплициран прошетка, гледање филм или заеднички ручек може да помогнат партнерите да се потсетат дека се љубовници и пријатели, а не само луѓе кои ги делат секојдневните обврски.
Редовната комуникација и интересот за чувствата на партнерот се уште еден важен фактор. Едноставно прашање како „Како ти помина денот?“ може да направи голема разлика и да покаже грижа и внимание. Според Соломон, разбирањето на внатрешниот свет на партнерот ја продлабочува блискоста и ја зајакнува врската.
Кога ќе дојде до конфликт, таа советува партнерите да избегнуваат обвинувања и наместо тоа да ги одвојат фактите од личната интерпретација. Пристапот со љубопитност, а не со осуда, овозможува подобро разбирање и намалување на одбранбените реакции. Несогласувањата, вели таа, не треба да се гледаат како битка што треба да се добие, туку како можност за подобро запознавање на партнерот и за заеднички раст.
На крајот, д-р Соломон потсетува дека партнерите се различни личности со различни погледи на светот. Среќните парови го прифаќаат тоа и наместо да претпоставуваат што мисли другиот, отворено бараат и кажуваат што им е потребно. Токму отворената комуникација и подготвеноста за учење, според неа, се темелот на долготрајната и здрава врска.
