Американскиот претседател Доналд Трамп изјави дека не ја исклучува можноста САД да се повлечат од НАТО, по неуспешните разговори меѓу Данска, Гренланд и Вашингтон за иднината на Гренланд. Тој оцени дека островот е „исклучително важен“ за националната безбедност на САД и дека секое решение без американска контрола е „неприфатливо“, пренесува „Тајм“. Данска остро реагираше, посочувајќи дека станува збор за сериозно несогласување, и најави зголемување на военото присуство на и околу Гренланд.
Поддршка изразија и неколку европски сојузници, меѓу кои Шведска и Германија, при што Копенхаген порача дека безбедноста на Гренланд е заедничка обврска на НАТО. Генералниот секретар на Алијансата, Марк Руте, предупреди дека Арктикот добива сè поголемо геополитичко значење поради активностите на Русија и Кина и дека во НАТО се водат разговори за зајакнување на безбедноста во регионот. Иако Трамп и претходно ја критикуваше Алијансата, правните експерти укажуваат дека евентуално повлекување на САД од НАТО не може да се случи без одобрување од Конгресот. Сепак, аналитичарите сметаат дека самото отворање на ова прашање веќе ја нарушува довербата и стабилноста во рамки на Алијансата.
